| ► | مارس 2011 | ◄ | ||||
| سبت | أحد | إثنين | ثلاثاء | أربعاء | خميس | جمعة |
| 1 | 2 | 3 | 4 | |||
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | |
قرر أخيراً ..
إنه يسد الشباك ..
ويصلَّح خشبه المكسور .
قرر ..
يقفل خرم الباب الوحيد ..
في البيت الوحيد ..
في العالم الوحيد .
قرر أخيراً ..
يرفع سبت البقال ..
والعيش .. والفول ..
يكسر قرص التليفون ..
ويولع كل الأنوار ..
قرر..
يلغي حواسه الخمسة ..
ويفتح مواسير الغاز وينام .
قرر أخيراً ..
ي
ع
ي
ش ……
· وطــن .
كيــوبيــد تاني مرة
تاني !!
لساك بتحاول حل اللغز؟!!
لساك محتار؟
طب شوف ..
كيوبيد اللي انت بتستنى سهامه ..
هناك ..
نايم وسط الأطفال النايمين في الطل
الصبح بيغسل عربيات مجانين الليل
وف آخر الليل
تلقاه وسط التايهين في الشارع
أو تحت الكوبري
أو جوه سلالم عمارات السوبر ناس
أو بيغافل كلب جعان
وبيسرق منه عشاه
هـــا
لساك بتدور على الحب؟
دور …
بس ما تنساش
بم إنك واحد من مجانين الزمن الجاي
اسأل جلادك عن عدد الجلدات
عدد الصعفات الكهربائية
ما انت كإنسان ..
تيجي كده وكده نعمل ميتين؟
انت تضربني كده وكده على دماغي
وانا كده وكده
أضربك على دماغك
يلا ..
يلا
ما ضربتش ليه؟
طب اقول لك
أضربك أنا على دماغك الأول
وانت بعدين
يلا ..
يلا
موت بقى
ها
حاسس بإيه؟
بص
على شان ما تخمش
أنا خدت عنيك
يلا كده وكده
نبقى اصحاب
حط إديك على كتفي وقول:
يا وابـور يا مولـع .. حط الفحم
وانا اقول لـك ولع .. حط الفحم
يا وابور يـا وبورنا .. حط الفحم
والله وجـاي دورنا .. حط الفحم
ها
حلوة اللعبة دي ؟
العب تاني
أربط إيدك ورا ضهرك
بتكلم نفسك؟
مش قادر تفهم إنك واحد
واقف بيدور على نُص جديد
على عمر جديد
على شمس تفك لسانك
وتحرك حتة ضوء جواك !!
متأخر حلمك جداً
من إمته الشمس بتدخل سراديب؟
ماتلومش النور
كتفت إديك
وعصبت مشاعرك
ورضيت
كنت بتتفرج على فعل حروفك
في قلوب المجانين بالشمس
كان الكيوبيد
يجمع قصاقيصك لاصحابك
ويطير:
حرفين للزهرة على الفستان
حرفين للوردة اللي في قلب كتاب الأحياء
سيرة ذاتية وأدبية
· الاسم: عزت محمد إبراهيم
· الاسم الأدبي: عزت إبراهيم
· ولـد فـي: 23 ديسمبر 1964م
· الصفـــة: شاعر عامية ويكتب المسرح وقصة الطفل
· المولـــد: قرية الزنكلون – مركز.. الزقازيق – محافظة.. الشرقية .
· يعـمـــل : مديراً لتحرير سلسلة: (فنون بلدنا) بالهيئة العامة لقصور الثقافة.
· عضو اتحاد كتاب مصر .
· صـدر لـه : من الأعمال في شعر العامية
· ديوان : " بنحب موت الحياة " سلسلة: إبداعات(هيئة قصورالثقافة 1999)
· ديوان : " حاجات مفقودة كتير" سلسلة: الجوائز(هيئة قصورالثقافة 2000)
· ديوان : " مشهد قديم " سلسلة: رؤى (هيئة قصورالثقافة 2002)
· ديوان : "الروح اللي طلعت النهارده"سلسلة :إشراقات جديدة (هيـئة الكتاب 2004)
· صـدر لـه : من آداب الطفل
· "كوخ صغير وشجرة كبيرة"(مجموعة قصص)سلسلة : كتاب قطر الندى(هيئة قصورالثقافة 2006)
· إسهامات : في النشر الإلكتروني
· له أكثر من مدونة أدبية على شبكة المعلومات الدولية الإنترنت باسم الشاعر/ عزت إبراهيم
دي الصورة اللي دايماً
كان مأجلها
ودا المشهد
اللي كان بيتمناه ميجيش
أو ينساه السيناريست
وميكتبوش أصلاً
ودي اللقطة اللي حوّلت الجبلين
هو دا اللي طلعت بيه من الدنيا ؟
هي دي السنسن اللي قاعدة تعدي من قدام عنيك !!؟
هو دا العمر اللي بتراهن عليه ؟
هي دي القضية ؟؟!!
أربع عقود لفين رقبتك
…………….
فرحان قوي
الشيب بدر راسك ولسه بتخطي
لساك سعيد وبتضحك
ضحكك جميل
البسمة دي بتفكرني ببكرة
ممكن يكون عادي
لا الشمس هتبطل تغيب
ولا القمر قاعد
الدنيا دي زي قلبك
لفة بخور
والمبخرة روحك
